भारतरत्न पंडित भीमसेन जोशी यांच्या प्रथम स्मृतिदिनानिमित्त हे काव्यपुष्प

भारतरत्न पंडित भीमसेन जोशी यांच्या प्रथम स्मृतीदिनानिमित्त हे काव्यपुष्प

'पुरिया' चे स्वर तव 'दरबारी'

भिजते सृष्टी तव 'मल्हारी' l

'बहार' आणी मम चित्ताला,

वंदन माझे स्वरभास्कराला. ll

तव 'यमनाचा' अवीट गोडवा,

'मुलतानी' अन शांत 'मारवा', l

चिर-स्वर-धन दिधलेस आम्हाला,

वंदन माझे स्वरभास्कराला. ll

तुझा जोगिया आणि भैरवी,

रसिकजनांचे नयन ओलवी, l

ईश्वरदर्शन क्षणाक्षणाला,

वंदन माझे स्वरभास्कराला. ll

तव महिमा मी कसा वर्णावा,

तू भास्कर मी खुजा काजवा, l

नि:शब्द करी तो रोज आम्हाला,

वंदन माझे स्वरभास्कराला. ll

गुरुमंदिरी तव अखंड भक्ती,

श्वासांमधुनी अचाट शक्ती, l

आदर्श जाहली अखिल जगाला,

वंदन माझे स्वरभास्कराला. ll

तव वाणीतून 'अभंग' गायन,

नसानसातून विठ्ठल चिंतन, l

मिळे संजीवन अचेतनाला,

वंदन माझे स्वरभास्कराला. ll

सूर तुझा तो नितांत निर्मळ,

परंतु गमतो आता मृगजळ, l

अमृतावरी काळाचा घाला,

वंदन माझे स्वरभास्कराला. ll

मैफिल ही तव आयुष्याची,

नियतीने संपविली का चि? l

दर्शन दे या तव भक्ताला,

वंदन माझे स्वरभास्कराला. ll

-- सौरभ जोशी