मला भावलेला राग मिया मल्हार

मला भावलेला राग मिया मल्हार

पाऊस सुरू झाला की मियाॅ मल्हार ऐकायला मी नेहमीच आतुरलेला असतो. कालंच पं.व्यंकटेश कुमारांचा आणि त्यानंतर स्व.वीणाताईंचा मियाॅ मल्हार ऐकला...आणि मियाॅ मल्हाराच्या स्वरूपानुरूप खालील ओळी पाझरल्या...मियाॅ मल्हारात जे शुद्ध-कोमल स्वर येतात, त्यांचा स्वभावधर्म दाखवण्याचा, आणि मियाॅ मल्हार ऐकताना माझ्या मनाला जसा पाऊस भावतो, त्याचे काव्यमय वर्णन करण्याचा हा छोटा प्रयत्न....

पाऊसधारा बरसत आल्या
थेंब टपोरे बहु ओघळले l
मोदेभरल्या मृदगंधातुन
मल्हाराचे स्वर पाझरले ll

दो षड्जांच्या कमानीतुनी
शुद्ध-कोमले स्वर अवतरले l
सात स्वरांना खेळायाला
मध्य सप्तकी अंगण केले ll

ऋषभस्वर तो रुसून बसला
म्हणे न येत मी खेळायाला l
प्रेमभरे समजुत काढाया
षड्जस्वर तो मागे बसला ll

मध्यमस्वरे उधाण आले
कृष्णमेघ ते बहु गडगडले l

सप्तस्वरांचे इवले अंगण
क्षणात ओले चिंब जाहले ll

गंधाराचे गुंजन करिता
अंगावरुनी ओल शहारा l
हिरमुसलेल्या चित्तामधुनी
फुंकून गेला नवाच वारा ll

पंचमस्वरे वनांत कोकीळ
मधुस्वरे रे कुहू बोलला l
अवखळशा त्या बाळझर्याला
नाद खळखळा देऊन गेला ll

मध्यमस्वरा पंचम चुंबून
निषाद कोमला पुढे स्पर्शला l
निषाद कोमल जाता जाता
विरहाची सल ठेऊन गेला ll

गूढगम्यता वातावरणी
डोंगरांतुनी होती दाटली l
शुद्ध धैवती पवन वाहिला
नकळत कैशी विरून गेली ll

शुद्ध निषादे चैतन्याचे
प्रपात दर्शन देते झाले l
मल्हाराच्या सप्तसुरांचे
इंद्रधनु मम मनी उमटले ll

-- सौरभ जोशी