ताल थेंबांचे वाजती
आला आला पावसाळा, ताल थेंबांचे वाजती,
वृक्षवेली गाणे गाती, हाती घेऊनिया मोती.
बहरला आसमंत, त्याला हिरवी झालर,
दर्या-खोरी पांघरती, शुभ्र धुक्याची चादर.
रानीवनी पानोपानी आला हिरवा बहर,
धरणीच्या मनगटी,लागे मृद्गंधी अत्तर.
धबधबे कोसळती,उड्या मारून खालती,
गार वार्याच्या गाण्याला,फेसाळत दाद देती.
उधाणल्या मनातून, एक अबोल चाहूल,
भिजतानाच दिसावे, तिचे नाजुक पाउल.
शहारले अंग कसे, थेंब घेउन कवेत,
मनातली सय तिची, ओली झाली ग फुलांत.
-- सौरभ जोशी
No comments:
Post a Comment