सद्गुरु माउली श्री नरसिंह सरस्वती स्वामींच्या जन्मदिनानिमित्त

त्रैलोक्याधिपती, त्रिगुणात्मक, कृपासिंधु, करुणासागर, भक्तवत्सल, दीनानाथ, परमसमर्थ, सद्गुरु श्री नरसिंह सरस्वती स्वामींचा जन्मदिन सद्गुरु माउली श्री नरसिंह सरस्वती स्वामींच्या चरणी हे काव्यपुष्प अर्पण.

कृपासिंधु नरसिंह सरस्वती जगद्गुरु माउली,

अखिल जगावर दीनानाथा, धर मायेची साउली.

एकटाच मी होतो जेव्हा अबोल होत्या दिशा,

पदाम्बुजी तव घेउनि मजला दाखविलीस सोन उषा.

गिरिवनाच्या भूमीवरती उभविलेस नंदनवन,

निमित्त मजला केलेस त्याते, भरून आले माझे मन.

ध्यानमंदिरी तव इथल्या जमले आज सारे भक्त जन,  

दिव्यानंदे ओले होती आज पहा मम नयन.

शिम्पवतोस धन संस्कारांचे बालमनांच्या पटलांवरती,

अशीच व्हावी अविरत सेवा, इच्छा मम तव चरणापुढती. 

सत्कार्यांच्या तटानमधुनी वाहविलीस मम सरिता,

आज तुझ्या या जन्मदिनी कृतकृत्य जाहलो आता.

तवप्रसादे सफल होवो भक्तजनांच्या मनोकामना,

गुणगान गावे तुझे कितीही, मम समाधान होईना.

तुझ्या कृपेचा वज्रलेप हा भक्तांवर राहू दे,

आनंदाची उष:प्रभा उगवून सदा राहू दे.

-- सौरभ य. जोशी.